ATURAN DOHOT PARATURAN
HURIA KRISTEN BATAK PROTESTAN
DAFTAR ISI
DAFTAR ISI
BAGIAN
PARJOLO
|
: PAMONAI.
| |
BAGIAN
PADUAHON
|
: ATURAN.
| |
Ponggol I
|
: Hatontuan
Umum
| |
Ponggol II
|
: Goar,
Inganan, dohot Parjongjongna
| |
Ponggol III
|
: Ojakan
| |
Ponggol IV
|
: Panindangion
| |
Ponggol V
|
: Parsombaon
tu Debata
| |
Ponggol VI
|
: Oikumene
| |
Ponggol VII
|
: Sangkap
Dohot Tujuan
| |
Ponggol VIII
|
: Ulaon
| |
Ponggol IX
|
: Organisasi
| |
Ponggol X
|
: Haruason
| |
Ponggol XI
|
: Parhalado
| |
Ponggol XII
|
: Parartaon
| |
Ponggol XIII
|
: Panutup
| |
BAGIAN
PATOLUHON
|
: PERATURAN
| |
Ponggol I
|
: Huria
| |
Ponggol II
|
: Ressort
| |
Ponggol III
|
: Distrik
| |
Ponggol IV
|
: Hatopan
| |
Ponggol V
|
: Angka Komisi di HKBP
| |
Ponggol VI
|
: Tohonan di HKBP
| |
Ponggol VII
|
: Rapot di HKBP
| |
Ponggol VIII
|
: BAGAN ORGANISASI HKBP
| |
BAGIAN PARJOLO
PAMONAI
Mamungka sian taon 1861, i ma taon hajongjongan ni HKBP,
sai maruba do Aturan Paraturan ala parubaan ni angka tingki na niadopan ni
huria i di portibi on songon pamatang ni Kristus. Alai nang pe maruba Aturan
Paraturan ni huria i, ianggo ojakan ni huria i, i ma Barita na Uli na tarsurat
di Buku na Badia i tongtong do hot. Parubaan ni Aturan Peraturan i holan na
paampithon dalan do i laho patulushon sitolu ulaon panjouon ni huria di
tongatonga ni portibi on, asa boi marparbuehon angka parbue na dumenggan.
Angka parubaan na naeng adopan ni huria di abad pa-21-hon
on, manang na ginoar milenium patoluhon tung andul do asing sian angka tingki
na salpu. Parhasak ni galumbang informasi dohot globalisasi na lam gogo jala
doras mambahen masa angka parubaan na mansai hatop dibagasan parngoluon ni
jolma marsadasada, parngoluon parsaripeon, parngoluon marmasyarakat, marbangso,
dohot marnegara, jala laos songon i do nang parngoluon parugamoon. Angka
parubaan dohot galumbang ni ngolu na masa i do patubuhon parsoalan na maol jala
multidimensional, na gabe tantangan siadopan ni huria nuaeng on dohot di tingki
na naeng ro. HKBP songon huria na disuru tu tongatonga ni portibi on ingkon
mangula do dohot proaktif, aktif, kritis, jala realistis laho mangadopi nasa
tantangan na maol i. Mardomu tu pangulaon na hombar tu tantangan i ma porlu
adong Aturan Peraturan na imbaru na marbona tu visi, misi,
dohot prinsip na
togu, i ma na di toru on :
Visi
HKBP mangerbang gabe huria na inklusif, dialogis, jala
ungkap huhut marhatauon jala marhagogoon pahembanghon parngoluon na marmutu
dibagasan holong ni Tuhan Jesus Kristus, rap dohot sude halak di bagasan
masyarakat global, tarlobi masyarakat kristen, asa gabe hasangapon di Debata
Ama pargogo na so hatudosan.
Misi
Marusaho do HKBP pahinsathon mutu ni sude ruas ni masyarakat, tarlobi
ruas ni HKBP, marhite angka panghobasion ni huria na marmutu asa marhagogoon
patulushon tona ni Tuhan Jesus di sude panggulmiton ni ngolu ni marsasahalak,
marsasaripe, raphon sude halak na di portibi on di tirket lokal dohot nasional,
di tirket regional dohot global laho mangadopi abad pa-21-hon.
Prinsip
Marsihohot do HKBP maniop angka prinsip na di toru on
laho patulushon misi,
mangeahi visi na
di ginjang i, i ma :
a. Gabe pangoloi, ndada asa dioloi
(Mrk.10:45)
b. Gabe sira dohot panondang( Mat.5:1 3-14)
c. Marsitutu pajongionghon hatigoran,
hadameon, dohot hasadaon ni na tinompa (Mrk.16: 15; Luk. 4: 18- l9).
ATURAN
Ponggol Parjolo
HATONTUAN UMUM
Bindu 1
Pangonaan ni Hata
1.
Aturan i ma angka buhu ni hatontuan na mendasar di HKBP.
2.
Paraturan i ma angka hatontuan na dipahembang sian Aturan HKBP.
3.
Aturan
dohot Paraturan HKBP na
dipajempek gabe AP-HKBP, i ma angka buhu ni hatontuan na mendasar dohot angka
hatontuan naung dipahembang di HKBP.
4.
Huria i ma parsaoran ni manang piga ruas ni HKBP di sada
inganan na tontu, niuluhon ni uluan ni huria marsadasada.
5.
Rapot
Huria i ma rapot partimbo di tirket huria na
mambahen haputusan laho patulushon sitolu ulaon panjouon ni huria dohot
mangulahon haputusan ni sinode Godang, Majelis Pekerja Sinode, Sinode Distrik
dohot Rapot Ressort hombar tu haporluan ni huria.
6.
Parhalado i ma ruas ni huria na tarjou jala tarpillit mamelehon
diri laho mnnghobasi ulaon ditongatonga ni huria.
7.
Sitolu
ulaon panjouon ni huria i ma
parsaoran, panindangion, dohot parasirohaon.
8.
Uluannihuria i ma na manguluhon huria marsadasada.
9.
Dewan
Koinonia i ma organ panghobasi di tirket huria na
mamingkiri dohot patupahon panghobasion na padasiphon parsaoran na saroha, na
sapingkiran, dohot na sapanghilalaan na manghamham seksi sikola minggu, seksi
remaja, seksi naposobulung, seksi parompuan, dohot seksi ama.
10.
Dewan
Marturia i ma organ panghobasi di tirket huria na
mamingkiri dohot patupahon ulaon marbarita na uli di tongatonga ni huria dohot
masyarakat, na manghamham seksi sending dohot seksi musik.
11.
Dewan
Diakonia i ma organ panghobasi di tirket huria na
mamingkiri dohot patupahon ulaon asi ni roha, pahinsathon parbinotoan dohot
hahipason, songon i nang patupahon panghataion dohot pamaoran tu masyarakat na
humaliang dohot tu pamarenta, na manghamham seksi diakoni sosial, seksi
pendidikan, seksi kesehatan, dohot seksi kemasyarakatan.
12.
Seksi i ma unit panghobasi di toru ni dewan di tirket huria.
13.
Resort i ma hadomuan ni huria marsadasada laho padasiphon dohot
pahembanghon parsaoran, panindangion, panghobasion di tongatonga ni angka
huria.
14.
Rapot
Resort i ma rapot partimbo di tirket resort na
mambahen haputusan laho mangulahon na tinontuhon ni Sinode Godang, Majelis
Pekerja Sinode, dohot sinode distrik.
15.
Pandita
Resort i ma na manguluhon huria sabungan huhut
mangkordinasi dohot manjamothon angka ulaon panghobasion di sude huria na masuk
tu resort i.
16.
Distrik i ma hadomuan ni manang piga resort laho padasiphon
dohot pahembanghon parsaoran, panindangion dohot panghobasion di tongatonga ni
distrik i.
17.
Sinode
Distrik i ma rapot partimbo di tirket distrik na
mambahen haputusan laho mangulahon na tinontuhon ni Sinode Godang dohot Majelis
Pekerja Sinode hombar tu haporluan ni distrik.
18.
Praeses i ma uluan ni distrik rap dohot angka kepala bidang.
19.
Majelis
Pekerja Sinode Distrik i ma
rapot na manghobasi distrik laho patulushon haputusan ni Sinode Godang, Majelis
Pekerja Sinode dohot sinode distrik rap dohot praeses dohot angka kepala
bidang.
20.
Bidang i ma organ na manguluhon panghobasion pasauthon sitolu
ulaon panjouon ni huria di tirket distrik. Pangadonghonon ni bidang dohot
uluanna dipahombar ma tu haporluan dohot haboion ni distrik i. Angka bidang na
adong i ma: bidang koinonia, bidang marturia dohot bidang diakonia.
21.
Sinode
Godang ima rapot hatopan partimbo di HKBP na
manotophon nasa hatontuan bona na mardomu tu sitolu ulaon panjouon ni huria.
22.
Majelis
Pekerja Sinode i ma rapot na mangula
laho mamingkiri dalan pasauthon haputusan ni Sinode Godang marhite Uluan HKBP
na niuluhon ni Ephorus.
23.
Uluan HKBP i ma sada tim na niuluhon ni Ephorus na marruashon
Sekretaris Jenderal, Kepala Departemen Koinonia, Kepala Departemen Marturia,
dohot Kepala Departemen Diakonia.
24.
Ephorus i ma uluan ni sandok HKBP, na laos uluan ni Uluan HKBP.
25.
Sekretaris
Jenderal i ma sahalak ruas ni Uluan HKBP na
manguluhon panghobasion hatopan di bidang administrasi umum dohot keuangan.
26.
Departemen
Koinonia i ma organ hatopan na manghobasi sude ulaon
na mardomu tu parsaoran di sandok HKBP, na niuluhon ni Kepala Departemen
Koinonia.
27.
Departemen
Marturia i ma organ hatopan na manghobasi sude ulaon
na mardomu tu panindangion di sandok HKBP, na niuluhon ni Kepala Departemen
Marturia.
28.
Departemen
Diakonia i ma organ hatopan na manghobasi sude ulaon
na mardomu tu diakoni.di sandok HKBP, na niuluhon ni Kepala Departemen
Diakonia.
29.
Badan
Audit HKBP i ma organ na
mamareso dohot mangevaluasi parhepengon, parartaon dohot pardalan ni sude
rencana kerja ni sude organ dohot unit panghobasi di HKBP.
30.
Badan
Penelitian dan Pengembangan HKBP i
ma organ na patupahon penelitian na mardomu tu parngoluon ni huria dohot
masyarakat laho pahembanghon dohot padasiphon panghobasion ni huria.
31.
Badan
usaha HKBP i ma organ na
mangusahahon sumber dana na porlu pangkeon ni HKBP laho patulushon
panghobasionna.
32.
Biro i ma organ panghobasi di toru ni Sekretariat Jenderal
manang departemen.
33.
Badan
Penyelenggara Pendidikan HKBP i
ma organ na manjalo mandat na gok sian Rapot Uluan HKBP manghobasi sude
pendidikan di HKBP di bagasan sada sistem na marorientasi mutu.
34.
Yayasan i ma organ sosial na pinajongjong ni HKBP manang angka
ruas ni HKBP marojakan tu Aturan Paraturan HKBP dohot paraturan ni pamarenta di
tirket Hatopan, distrik, resort manang huria.
35.
Komisi i ma orgah na dipajongjong hombar tu haporluan ni HKBP
di tirket Hatopan, distrik, resort, manang huria.
36.
Mutu i ma haumbuhon ni panghobasion dohot na hinaporluhon ni
huria marojahan tu lomo ni roha ni Debata na manghamham partondion,
panghilalaan, parbinotoan dohot pamatang.
Aturan
Ponggol II-V
PONGGOL PADUAHON GOAR, INGANAN DOHOT
TINGKINA
Bindu 2
Goar
1.
Goar, i ma Huria Kristen Batak
Protestan na pinajempek gabe HKBP.
2. Huria Kristen Batak Protestan (HKBP)
i ma pardomuan ni halak Kristen sian sude marga dohot houm ni bangso Indonesia,
dohot nasa bangso di sandok portibi on, na tardidi tu bagasan Goar ni Debata
Ama, AnakNa Tuhan Jesus Kristus dohot Tondi Parbadia. Sada hapataran ni
pamatang ni Kristus do HKBP, na manghamham na porsea na marpanindangion di
sandok portibi on.
3.
Na jongjong do HKBP di Indonesia on
dohot di sandok portibi on jala mar-Kantor Pusat di Pearaja -Tarutung.
4. HKBP ojak 7 Oktober 1861, na
jongjong sian hadirionna marhitehite pangulaon ni Tondi Porbadia. Laos diokui
Pamarenta do HKBP marhite bisolot No. 48 tanggal 11 Juni 1931 na tarsurat di
Staatsblad taon 1932 No. 360 dohot haputusan ni Direktur Jenderal Bimas Kristen
Protestan Departemen Agama No. 33 tahun 1988 tanggal 6 Februari
1988. Jala marhak do HKBP songon badan hukum marnampunahon
tano marhite surat haputusan ni Menteri Dalam Negeri Nomor: SKAO/DJA/1985
tanggal 28 Pebruari 1985.
PONGGOL PATOLUHON
OJAHAN
Bindu 3
Ojahan
Ojahan
ni HKBP, i ma Jesus Kristus ( 1 Kor. 3 : 11), na hinatindanghon ni Buku na
Badia, i ma Bibel, i do mual ni hasintongan dohot hangoluan.
PONGGOL PAOPATHON
PANINDANGION
Bindu 4
Ulaon Panindangion
· Ia panidangion haporseaon ni HKBP (
Konfessi HKBP ) i ma udut ni angka panindangion haporseaon naung adong hian
najolo, isara Apostolicum, Niceanum, Athanasianum. Marhite parjamitaon,
panindangion, surat tongosan, ende huria, tangiang, liturgi, buku parsiajaran
dohot na asing, tangkas do tarida tongtong pangokuan na Kristus do Ulu ni Huria
i jala Tuhan ni angka tuan.
·
Di bagasan pangoloion di Hata ni
Debata na gabe mual ni parjamitaon dohot haporseaon, marparnindangion do Huria
i di angka rapot huria, di pangulaonna, di ngoluna siganup ari siala hapataran
ni Debata Sitolusada, i ma Debata Ama, Anak dohot Tondi Parbadia. Nasa rapot ni
huria, tohonan, parmahanion dohot panghobasion di huria nang Aturan ni Huria
marondolan tu panindangion haporseaon ni Huria do.
PONGGOL PALIMAHON
PARSOMBAON TU DEBATA
Bindu 5
Ulaon dohot Hatiha ni HKBP Marsomba
Tu Debata
1. Parmingguon:
Dipatupa Huria do parminguon ganup ari Minggu di Gareja dohot di inganan na
tontu di Huria na so adong dope garejana. Hata ni Debata naung diaturhon di
Almanak HKBP do sijamitahononna disi, jala liturgi na di Agenda HKBP do
sipangkeon, songon i nang ende na di Buku Ende HKBP dohot Buku Ende na
niangkuan ni HKBP do siendehonon.
2. Partangiangan:
Dipatupa Huria do partangiangan keluarga, lunggu (Wijk), kelompok, kategorial
manang kasual di gareja, di bagas, manang di inganan na asing na tinontohon ni
huria.
3. Punguan
Parheheon Partondion: Na boi do patupaon ni Huria punguan parheheon partondion
na nidohotan ni ruas ni huria i dohot masyarakat di inganan na tinontuhon ni
huria.
4. Sakramen
Siradotan ni Huria do Sakramen na pinatikkon ni Tuhan Jesus i ima Pandidion na
Badia dohot Parpadanan na Badia. Pamasaon ni Huria do Pandidion na Badia tu
angka posoposo dohot tu angka na magodang na so tardidi hian dope andorang
posoposo hombar tu parturena di Agenda HKBP. Pamasaon ni Huria do Parpadanan na
Badia di gareja manang di luar ni gareja tu angka na marsahit hombar tu
parturena di Agenda HKBP. Pandita do na patupahon ulaon Sakramen, jala holan
mangurupi marhobas do angka partohonan na asing.
5. Pangajarion
di Hata ni Debata: Dipatupa Huria do pangajarion di Hata ni Debata tu sude ruas
ni huria: dakdanak, remaja, naposobulung dohot natuatua asa lam ganda
pangantusion, panghangotuhonon dohot pangulahonon di Hata ni Debata na tau
pahothon nasida di ngolu hakristenon i.
6. Manghatindangkon
haporseaon: Dipatupa Huria do parguruan tu angka na naeng manghatindangkon
haporseaon. Pandita do na manangkasi hatauon nasida niadopan ni Parhalado Huria
dohot natorasnabe di na !aho paujungkon parguruon i. Diadopan ni Huria i do
nasida jongjong manghatindangkon haporseaon di tingki ari Minggu mangihuthon
parturena songon na di Agenda HKBP.
7. Parbagason:
Sipasupasuon ni Huria do angka na naeng marbagas ditongatonga ni Huria
mangihuthon parturena songon na di Agenda HKBP, dung jolo adong panangkasion ni
Parhalado Huria.
8. Angka
Pesta di Huria
a. Angka
on ma Pesta di Huria na songon parningotan
b. Pesta
parningotan di ari Hamamate ni Tuhan Jesus.
c. Pesta
parjolo dohot paduahon haheheon ni Tuhan Jesus.
d. Pesta
parningotan hananaek ni Tuhan Jesus.
e. Pesta
parjolo dohot paduahon haroro ni Tondi Parbadia.
f. Angkup
ni i, adong do parpunguan ni Huria di tingki parningotan di Reformasi, di bona
dohot do ujung ni taon, songon i nang di angka tingki na ringkot.
Bindu 6
Hajuarabagason
Sipatupaon
dohot siluluan ni Huria do angka dalan parohon hepeng dohot arta sipangkeon
manghobasi Huria i dohot pahembangkon parngoluon ni ruas, parhalado,
kesejahteraan ni angka na pensiun di HKBP, dohot masyarakat marhite: papungu
pelean di parmingguan dohot di angka partangiangan na pinatupa ni huria,
guguan, sumbangan, hibah, dohot angka usaho ni Badan Usaha HKBP, Yayasan,
Koperasi, dohot angka rumang na asing na so maralo tu Hata ni Debata.
Aturan
Ponggol VI - X
PONGGOL
PAONOMHON
OIKUMENE
Bindu 7
Hasadaon ni HKBP dohot Halak Kristen
· Parsidohot do HKBP papatarhon
hasadaon ni angka Huria sisada haporseaon dohot HKBP nang dohot sude halak
Kristen di portibi on hombar tu tangiang ni Tuhan Jesus: "Asa sada nasida
saluhutna, Songon Ho ale Amang di bagasan Ahu jala Ahu di bagasan Ho, songon i
ma nang nasida di bagasan hita, asa porsea portibi on, Ho marsuru Ahu "
(Joh. 17:21).
· Suang songon i nang poda ni Apostel
Paulus na mandok : "Sada do Tuhan sada do haporseaon, sada do nang
pandidion. Sada do Debata, Ama ni sasude, sigomgom saluhut, sitorusi salulut
jala siingani saluhut " (Efesus 4:5-6).
PONGGOL PAPITUHON
SANGKAP DOHOT TUJUAN
Bindu 8
Sangkap DohotTujuan ni HKBP
1. Pahothon
dohot patoguhon pardalan dohot parjongjong ni HKBP.
2. Mamaritahon
dohot manghangoluhon Hata ni Debata
3. Mangaramoti
hapolinon di pamaritahonon dohot pamodahonon di Hata ni Debata
4. Paturehon
dirina asa gabe hasangapon di Goar ni Debata Ama, Jesus Kristus dohot Tondi
Porbadia
PONGGOL PAUALUHON
ULAON
Bindu 9
Ulaon ni HKBP
Ulaon ni Huria i ma pahembanghon
Harajaon ni Debata marhitehite ulaon parsaoran, panindangion, dohot
parasirohaon.
PONGGOL PASIAHON
ORGANISASI
Bindu 10
Huria, Resort, Distrik, Hatopan
manang Kantor Pusat HKBP
1. Huria
i ma punguan ni pigapiga balak na porsea, naung tardidi, jala rade pasauthon
Harajaon ni Debata dohot na manghangoluon haluaon na sian Jesus Kristus.
2. Huria
na marhasadaon di Resort, Resort na marhasadaon di Distrikjala Distrik
marhasadaon di Hatopan ni HKBP.
Bindu 11
Organ-Organ Panghobasi
Laho
patulushon ulaon panghobasion di HKBP, dipatupa do angka Organ panghobasi, i ma
Departemen, Sekretariat Jenderal, Pusat Penelitian dan Pengembangan, Badan
Audit, Badan Usaha Pusat, Badan Penyelenggara Pendidikan, Yayasan, Bendahara
Hatopan, Komisi, Biro dohot angka unit na di toruna.
PONGGOL PASAMPULUHON
HARUASON
Bindu 12
Ruas ni HKBP
1. Ia
ruas ni HKBP i ma ganup halak naung tardidi tu bagasan Goar ni Debata. Ama,
AnakNa Jesus Kristus, dohot Tondi Parbadia.
2. Sude
ruas ni HKBP ingkon umboto jala manghangoluhon Hata ni Debata marhite na
ringgas marsiajar di parguruan na pinatupa. ni HKBP dohot parguruan na asing na
so maralo tu poda ni HKBP, manghatindanghon haporseaon, manghangoluhon
panindangion haporseaon di HKBP (Konfessi), unduk tu Aturan dohot Peraturan
dohot Ruhut Parmahanion dohot Paminsangon ni HKBP.
3. Horong
ni ruas ni Huria hombar tu umur i ma dakdanak, remaja, naposo bulung dohot
natuatua.
Bindu 13
Hak ni Ruas
Na
marhak do ganup ruas ni huria taruli di ulaon : pandidion na Badia, Ulaon na
Badia, Pamasumasuon pardongan saripeon, manghatindanghon haporseaon, jala
manjalo parmahanion; pangapulion tu na marsahit, na marsitaonon, panogunoguon
keluarga siala na hona uhum negara dohot na hona uhum Huria (Ruhut Parmahanion
dohot Paminsangon); tangiang pangondianon dohot ragam ni pasupasu marhitehite
panghobasion di Huria.
Bindu 14
Kewajiban ni Ruas
Kewajiban
ni ruas ni Huria do manarihon nasa na ringkot sipangkeon di Huria i marhite na
mamelehon diri (Rom. 12 :1) dohot na pasahathon ragam ni pelean (Psalm 50 : 14,
23; Maleakhi 3:10), sian las dohot ias ni roha ( Il Kor. 9: 7).
Bindu 15
Hadoson ni Hak dohot Kewajiban ni
ruas baoa dohot ruas boru-boru
Dos
do hak dohot kewajiban ni parompuan dohot baoa di HKBP, laos songon i do nang
di haruason di angka organ panghobasi.
Bindu 16
Hasosohot ni Haruason
Mansohot
do sada halak ruas ni HKBP sian haruason molo ndang olo be unduk tu Konfessi,
Aturan dohot Peraturan, Ruhut Parmahanion dohot Paminsangon ni HKBP, songon i
molo dung monding.
Aturan
Ponggol XI – XIII
PARHALADO
Bindu 17
Parhalado ni HKBP
1. Laho
pasauthon ulaon panindangion, parngoluon dohot panghobasion ala ni Kristus
dipabangkit do Parhalado, najinou ni Debata marhite huria i jala na olo
mamelehon dirina huhut na unduk tu Konfessi dohot tu Aturan Peraturan HKBP.
2. Parhalado,
i ma:
2.1 Parhalado
Partohonan i ma angka partohonan napinabangkit ni HKBP marhite Agenda HKBP,
dohot naniangkuan ni HKBP.
2.2 Parhalado
na so Partohonan i ma ruas ni Huria na olo mamelehon dirina hombar tu
silehonlehon na pinasahat ni Debata tu ibana (1 Pet. 2:5; 1 Kor. 12).
2.3 Tarbagi
do parhalado hombar tu haboion ni tingkina.
Bindu 18
Uluan ni HKBP
1. Uluan
ni Huria do na manguluhon Huria pagaran marsadasada, Pandita Resort do
manguluhon di Huria sabungan.
2. Pandita
Resort do na manguluhon Resort.
3. Praeses
rap dohot Kepala Bidang do na manguluhon Distrik.
4. Ephorus
rap dohot Sekretaris jenderal dohot Kepala Departemen do na manguluhon sandok
HKBP.
PONGGOL
PASAMPULUDUAHON
PARARTAON
Bindu 19
Parnampunaon
HKBP
hatopan do nampuna sude arta na adong di HKBP, na langsung manang na so
langsung niramotan ni Kantor Pusat, na adong di Huria marsadasada, Resort,
Distrik, Departernen, Lembaga, Badan Penyelenggara Pendidikan, Badan Usaha
HKBP, Yayasan dohot na di Hatopan HKBP.
Bindu
20
Rumang
ni arta
Ia
arta ni huria, i ma nasa arta na marrumang hepeng, surat na mararga dohot
barang na morot dohot na so morot di sandok HKBP.
Bindu
21
Pangaramotion
1. Pangaramotion
di arta ni huria, dipasahat do tu angka Huria marsadasada, Resort, Distrik,
Departemen, Lembaga, Badan Penyelenggara Pendidikan, Badan Usaha HKBP, Yayasan
dohot na di Hatopan HKBP.
2. Di
ginjang ni pangaramotion na di ayat 1, adong pangaramotion hatopan marhite
Badan Audit HKBP.
PONGGOL PASAMPULUTOLUHON
PARATURAN
Bindu 22
Taringot tu Aturan on
Nasa
hatontuon na adong di Aturan on sipatorangon jala sipahembangon do marhite
angka hatorangan na umbuk dibagasan peraturan, jala ala ni i na sada do Aturan
on dohot Paraturan laho patotahon ulaon ni HKBP.
---------------------------------
PARATURAN
0 komentar:
Posting Komentar